کھاریاں کے علاقے گلیانہ روڈ پر تیز رفتاری کے باعث کار اور منی بس کے درمیان شدید تصادم ہو گیا، جس کے نتیجے میں کار میں سوار تین نوجوان شدید زخمی ہو گئے۔
حادثے کی اطلاع ملتے ہی ریسکیو 1122 کے اہلکار موقع پر پہنچ گئے اور زخمیوں کو ابتدائی طبی امداد فراہم کرنے کے بعد فوری طور پر قریبی اسپتال منتقل کر دیا۔ عینی شاہدین کے مطابق حادثہ کار کی تیز رفتاری کے باعث پیش آیا، جس کے باعث گاڑی بے قابو ہو کر منی بس سے ٹکرا گئی۔
حادثے کے بعد گلیانہ روڈ پر ٹریفک کی روانی کچھ دیر کے لیے متاثر رہی، جسے پولیس اور ریسکیو اہلکاروں نے کنٹرول کر لیا۔ پولیس کے مطابق واقعے کی تحقیقات شروع کر دی گئی ہیں۔
